السادة الأخوان المسلمين
ممكن كام سؤال كدة ومعاهم كلمتين
إنتوا مين ؟
إنتوا إخوان مين ؟
و لما إنتوا المسلمين إحنا إية ؟
مش هو نفس الدين ولا إحنا عايشين بدين تانى غير ال إنتوا عايشين بيه؟
هو إحنا المغضوب عليهم والضالين
وإنتوا بس المهتدين ..المرسلين بدين جديد وجاين تعرفونا بية؟
طب سؤال تانى يمكن ألاقى رد علية
إنتوا عايزين إية؟
دين ولا دنيا و سياسة وسلطة
توهتونا لأنكوا تايهين
واقفين مكانكم محتارين
ما بين الشمال واليمين
عين ع الدنيا وعين ع الاخرة
عين ع السلطة وعين ع الدين
إل قبلكم كانوا واضحين
عباد للسلطة والمال وحاربوا الدين
وانتوا بتخدرونا وبتسكتونا بالدين
إنتوا عايزين إية؟
عاوزينا نعيش الدنيا بالدين
طب
هنعيشها بأى دين
الدين ال إحنا علية
ولا دين المرشد ال بتبوسه إيدية
بأى دين وإنتوا بأساميكم الكتيرة قسمتونا وقسمتوا الدين
هبقى إخوانى ولا سلفى ولا سنى ولا ...ولا ..
طب لما إنتوا واحد
طب كل الاسامى دى لية
لما تعرفوا تبقوا واحد إبقوا مشونا بالدين ال تتفقوا علية
بس إبقوا عرفونى هيبقى إسمى إية
يا إخوانى إنت وهو ..دين ربنا مش بالقوة
الدين فى دستور رب العالمين
ال موجود بينا من ألاف السنين
مش فى دستور الأخوان المسلمين
وال طالب الهدى هيهتدى ولو عاش بين ملحدين
وال حابب الكفر هيعيشه ولو عاش بين مرسلين
لا إنتوا ولا مية دستور هيفرض الصح جوانا
سيبونا لل خالقنا .. لا إحنا معصومين ولا إنتوا معصومين
و لا إحنا شيعة ولا غاوين يبقالنا حد نتبارك بية ونتمسح فية
ولا عندنا صكوك غفران ...إحنا اسمنا فى كلمة واحده
مسلمين
ماتزعلش من كلامى يا شيخنا ..قصدى يا سعادة البية
(حيرتنى أناديك بأية)
ما أنا خايف من يوم تقيموا فية الحد على ال يذكر
أسم (المرشد) الأمام كدة من غير ما يقول
رضى الله عنه
أو علية الصلاة والسلام
وكفاية كدة خلص الكلام
كان نفسى ألاقى لأسئلتى رد
بس إنتوا يا دوب بتشرعه وتكفره وتقيموا الحد
ولا بترده على حد
بقلمى / ahmedshshsh(Ahmed sayed)
